Додека ги отвораш очите

ДОДЕКА ГИ ОТВОРАШ ОЧИТЕ

ДОДЕКА ГИ ОТВОРАШ ОЧИТЕ
УШТЕ ОД РАНИ ЗОРИ
СО НАМЕРА ДА ГО ЗГРАБИШ ДЕНОТ
АМА НЕ И ОТСЈАЈОТ
ГЛЕДАЈЌИ ГО КАФЕТО ВО ЃЕЗВЕТО
КАКО ПОМПЕЗНО СЕ КРЕВА
ЗАЕДНО СО МАГЛАТА ПОД ВОДНО
ЧИТАЈЌИ ГИ ВОЛШЕБНИТЕ ПЕСНИ
НА РАНИОТ ХЕЛДЕРЛИН
ДОДЕКА ВЛЕГУВАШ ВО БАЊАТА
БУДЕЈЌИ СИ ГО ТЕЛОТО
ОД БРОЈНИТЕ ТИ ПАЃАЊА
ПО СУРИТЕ КАРПИ
ВО БЕЗДНАТА НА ЖИВОТОТ
ТОГАШ Е НАЈДОБРО
ДА СЕ НАПАДНЕ ЅВЕРОТ
ВО НОВАТА КУЛА
ГОРЕ НА РИДОТ
КОЈА НАДМЕНО СЕ ВИШИ
ДУРИ ДО НЕБЕСА
ТОГАШ Е НАЈДОБРО
ДА МУ СЕ ЗАДАДЕ УДАРОТ
ДОДЕКА НЕ ИСКИПИ КАФЕТО
НА ВЖЕШТЕНАТА РИНГЛА
ЗАЕДНО СО ОНАА ВЕЧНА
И НАСУШНА ПОТРЕБА
ЗА КОНЕЧНА ПРЕСМЕТКА
СО ВЕКОВНИОТ ДУШМАН
КОЈ ТАКА СО ГОДИНИ
ТИ ЈАДЕ ОД УТРОБАТА
КАКО ГЛАДЕН ОД ЧИНИЈА

НЕМАШ ЛИ КОМУ ДА СЕ ОБРАТИШ

НЕМАШ ЛИ КОМУ ДА СЕ ОБРАТИШ
ЧИТАЊЕТО Е ИСТО
ШТО И ПИШУВАЊЕТО
ВО МОРЕ ОД КНИГИ
СЕКНУВА ПОТРЕБАТА
НА РЕЧНОТО КОРИТО
ОД БУЈНА НАДОЈДЕНА РЕКА
КОГА НЕМАШ ЗЕМЈА
ДА ЈА ПОЛЕВАШ

НЕМАШ ЛИ КОМУ ДА СЕ ОБРАТИШ
ПИШУВАЊЕТО Е ИСТО
ШТО И ЧИТАЊЕТО
КОГА ОПАШАН СО ЌЕБЕ
ВО ЛАДНАТА СОБА
ТИ СЕ ЗАЛЕДУВА И ПОТРЕБАТА
ДА МУ ЈА ОБЈАСНУВАШ НА БЛИЖНИОТ
АЗБУКАТА НА ПОСТОЕЊЕТО
КОГА ПРОСТО СЕ ПРЕКРШУВА
КАКО ЗАДУМАНА СТРЕЛА
НА ТОЛКУ ПРОЧИТАНИ КНИГИ
НА ТОЛКУ ТЕШКИ РАЗМИСЛИ
НА ТОЛКУ ЖИВИ ВИСТИНИ
ДА СЕДНЕШ И ДА ЈА НАПИШЕШ
ИСТОРИЈАТА НА ГОЛЕМИОТ ПОРАЗ
НА ЦЕЛ ЕДЕН НАРОД
СО СИТЕ НЕГОВИ ВЕКОВНИ
ЗАБЛУДИ И ИЛУЗИИ
КОИ УШТЕ ОД ДАМНИНА
КАКО ЗМИИ ОТРОВНИЦИ
СИ ГИ НЕГУВАЛ ВО ПАЗУВИ

НЕМАШ ЛИ КОМУ ДА СЕ ОБРАТИШ
СЕЕДНО ТИ Е
ЧИТАШ ИЛИ ПИШУВАШ

Цане Ризески е роден на 07.02.1958 година во Скопје каде и завршил филозофски факултет - историја. Низ книжевната периодика е присутен подолги години. Автор е на збирките песни: „Во меѓувреме“ (1988) за која ја добил наградата „Студентски збор“; „Око и пустина“ (1991) и „Никита“ (2001).

Слики: Честер Арнолд