Критична маса #49: Да ги извадиме помошните тркала!

24.05.2016 02:57
Критична маса #49: Да ги извадиме помошните тркала!

Датум: среда, 25.05.2016
Почеток: 17:30, Плоштад Македонија

 

4 години е возраста кога најголем дел од децата имаат доволно предиспозиции да балансираат и да се ослободат од помошните тркалца.

Во актуелните техники за учење балансирање, помошните тркала се и изоставувани.

Наше Скопје на точак, нашата скопска Критична маса на крајот на мај 2016 полни 4 години.

Ја доживуваме оваа годишнина како возраст, како клучно време слично на она во развојот на децата.

Поединечните проблеми со кои се соочуваме се многупати обработувани во темите на претходните критични маси, во многу постови, текстови, дописи, анкети.

Треба ли да ги повторуваме?

Паркирани возила на патеките? До кога?
Високи рабници по патека каде треба да се движат тркала? До кога?
Широки многубројни ленти за загадувачки автомобилски сообраќај, наспроти тесни тротоари за мешање на велосипеди и пешаци? До кога?
Брзината на автомобилите поважна од безбедноста на пешаците и велосипедистите? До кога?

4 години е добра возраст да се надминат детските проблеми.....

…………..

4 години ги шараме заедно скопските улици, градиме полека но сигурно Критична маса! Критична маса која се проширува и низ другите градови во Македонија!

Возењето секој сам секој ден е промената за која сонуваме. Тоа да се прави во безбедни услови и уживање е она за кое се бориме.

Возењето заедно секоја последна среда од месецот е начинот на кој покажуваме дека нè има, и на возачите, и на политичарите, и на сограѓаните кои не помислиле на велосипедот како потенцијален превоз, зашто немало кој да им посочи.

Критична маса е нашето збирно место, каде се собираме, протестираме, бодриме и радуваме заедно.

Местото каде заедно го правиме она за што се залагаме, промената, промената која сакаме да ја видиме во светот. Ние се залагаме за возење точак и ние возиме точак!

Дојди на оваа Критична маса да прославиме 4 години тивка, но сигурна промена.

Среќен 4-ти роденден, Скопје на точак!

Да ги извадиме помошните тркала!

Извор: natochak.blogspot.mk

Слични содржини

ОкоБоли главаВицФото