Лажни пророци

Акцијата „Лажни пророци“ е серија од протестни изведби во јавен простор на неколку песни од Блаже Конески. Активистите и уметниците ги изведуваат песните на локации кои имаат важно симболичко значење - пред простори урнисани од „проектот“ Скопје 2014, како и во Паркот на жената борец.

Дел од изведбите на песните на Конески се придружени со формирање живи скулптури кои асоцираат на естетиката и симболиката на спомениците од НОБ, историски период тенденциозно запоставен изминативе десетина години.

„Живата скулптура ја носи и симболиката на отпор против сфаќањето на културата исклучиво како нешто 'мртво' и опредметено, а ја афирмира културата на 'живост', и во протестна и активистичка смисла. Блаже Конески е еден од клучните ликови на модерна Македонија, личност која има огромни заслуги за еманципацијата, развојот и модернизацијата на Македонија во контекст на современата регионална и европска култура. Токму затоа неговите песни се одбрани при изразувањето протест против денешната девастација на сè што е модерно во македонската култура“, велат активистите.

Учесниците во акцијата „Лажни пророци“ изработија и видео запис од читањата на песните на Конески, како и дваесетина стенсили на различни локации во Скопје.