Протестна (претесна) песна

Улиците се претесни за сите
замолчувани, обезвреднувани,
понижени и навредени.

Булеварите се прекратки за сите
угнетувани, премолчувани,
обесправени, обесчестени.

Се сечат дрвореди. Се рушат планини.
Се шират улици. Се продолжуваат
булевари. Но пак сѐ е претесно.

Пак се игра нечесно. Пак иста перипетија:
за побунетите крај патиштата пак се
креваат крстови. За нови распетија.

Фотографија: Ванчо Џамбаски