Изложба за Шарената револуција во Вашингтон

17.10.2016 16:29
Изложба за Шарената револуција во Вашингтон

Фото: Роберт Атанасовски

 

Изложба на фотографии од Шарената револуција ќе се одржи од 12-ти ноември до 18-ти декември во Колеџот за уметност и наука при Американскиот универзитет во Вашингтон.

„Со оглед на критичната состојба во Македонија, би сакала да помогнам и преку изложба да ги запознаам луѓето, овде во Вашингтон, барем малку повеќе со она што се случувало“, вели во разговор за ЦИВИЛ Медиа, Анета Георгиевска- Шајн, организаторка на изложбата на фотографии од Шарената револуција.

Фото: Ванчо Џамбаски

„Кога го информирав директорот на Кацен центарот при Американскиот универзитет, Џек Размузен, за мојата идеја, тој се согласи, затоа што секогаш е заинтересиран за добри проекти, особено ако имаат уметничка вредност, но и социјална и политичка тежина. Условот беше јас да ги изведам сите организациски работи и да обезбедам средства, и тоа го правам во моментов со кампања и со постојана комуникација со дијаспората“, ни изјави Георгиевска-Шајн, осврнувајќи се на процесот на договарање на изложбата.

„Автори на фотографиите се Роберт Атанасовски, Кире Галевски и Ванчо Џамбаски. Веднаш се согласија да помогнат и да учествуваат, без условувања. Селекцијата, по седум фотографии од секој од нив, ја направив јас. Идејата е да се претстават основните елементи на Шарената револуција и да се долови духот на граѓанското движење. Освен избраните фотографии, ќе можам да покажам уште многу други на панел-дискусијата што ја планирам на 29-ти ноември во 18:00 часот, како дел од изложбата“, ни изјави Георгиевска-Шајн, осврнувајќи се на процесот на договарање на изложбата.

Фото: Кире Галевски

„Желбата е оваа изложба да постигне неколку работи. Една цел е да анимира што повеќе луѓе од дијаспората, посебно тие кои досега стоеја настрана, сметајќи дека не можат да помогнат. Не помалку важно е преку нашиот ангажман да им дадеме поддршка на сите оние кои што се стремат кон позитивни промени во Македонија. Конечно, сакаме да ја запознаеме јавноста во Вашингтон подобро со она што се случувало и се случува во земјата, посебно во овој предизборен период“, изјави Георгиевска-Шајн.

Извор: civil.org.mk

Слични содржини

Активизам / Фотографија
Општество / Активизам / Фотографија
Активизам / Фотографија

ОкоБоли главаВицФото