1009 hPa
62 %
12 °C
Скопје - Пет, 19.04.2024 18:59
Знаеш ли како се викаат јагоди на фарси? Тут фаранги.
Фаранги значи странски; тут - бобинки. Се дружам со
луѓе од Колумбија, Турција и Иран. Сите имаме ќерки
на по една-две години, и научив како се вика „Види!“
на шпански („Мира!“), а еднаш ми направија и турско
кафе. По некој турски збор си донесов од Македонија.
На фарси, ноход фаранги е грашок, а само ноход - наут.
Турчинката рече, „Ах, и ние ноход велиме за леблебија“.
А ќерка ми, таа веќе сè разбира. Немаме телевизор,
па листа сликовници за разонода. Сама ги избира,
ми седнува во скут, ги гледа сликите и ми покажува:
четка за заби (прст во устата, лево-десно со главата),
топка („Бо!“), па уво, нос, чело, веѓи, и очиња. Вели
„Мам-мам“ за јадења. Јас станав експерт за доење,
менување пелени, декодирање бебешки. Ама, знаеш,
портокал си е портокал и на фарси и на македонски.