Зимски поетски фестивал СВП 2017

24.02.2017 03:59
Зимски поетски фестивал СВП 2017

Од 25 февруари до 1 март ќе се одржи второто издание на Зимскиот поетски фестивал на Струшките вечери на поезијата. Свеченото отворање ќе биде во Младинскиот културен центар во Скопје со почетокот во 20 часот.

Согласно програмската концепција, Зимскиот поетски фестивал е програмско проширување со кое СВП преку едни поинакви програмски активности продолжува со својата улога во македонската култура да ги презентираа најзначајните современи поети од светот, но и актуелните книжевни достигнувања во македонската поезија.

Зимскиот поетски фестивал во своето прво издание понуди поинаков пристап во концепцијата, во структурата, во начинот на презентација, во целната публика... Ставајќи во фокусот четворица автори чие творештво е врвно по естетските и уметничките вредности во светски рамки, при што низ три различни приоди ѝ се претставени на македонската книжевна јавност: преку издавачки проекти, автопоетички предавања на учесниците и поетски читања, и книжевни разговори.

Фестивалот е базиран на издавачката дејност на СВП, на авторите чие творештво е објавено во превод на македонски во едицијата „Плејади“. Преку Зимскиот поетски фестивал овозможуваме рецепцијата на нивното творештво да биде поширока и потемелна. Преку академските предавања на авторите, кои се организирани во соработка со Филолошкиот факултет „Блаже Конески“ во Скопје, како партнер во организацијата на фестивалот, студентите, но и другата академска публика ќе има можност да се запознае со поетичките и естетските аспекти на нивното творештво, но и за интересни книжевни дискусии. Најпосле, преку поетските портрети, кои покрај поетските читања вклучуваат и разговори со исклучително информирани модератори, ја продолжуваме нашата мисија, не само во нудењето на квалитетна програма, туку и во освојување на нова публика, на нови читатели. Тоа е и основен фокус на овој фестивал – развојот на нова публика.

Годинашни учесници на Зимскиот поетски фестивал на СВП ќе бидат Ласе Содерберг од Шведска, Хабиб Тенгур од Алжир, Хасан Зактан од Палестина и македонскиот поет Иван Џепароски, како добитник на награда„Браќа Миладиновци“ во 2016 за најдобра поетска книга напишана на македонски јазик и објавена меѓу две изданија на СВП.

Шведскиот поет Ласе Содерберг е веќе објавен од страна на СВП со поетскиот избор „Земјата е сина“ во 2013 година, додека поетскиот избор на Хасан Зактан „Како сламена птица ме следи“ ќе биде промовиран токму на овој фестивал. Во истата едиција „Плејади“ на СВП за време на годинашните Струшки вечери на поезија во август ќе биде промовирана и книгата со поетски избор од творештвото на Хабиб Тенгур, како и книгата „Светлината на Света Гора“ од Иван Џепароски во превод на англиски јазик. За ова издание на Зимкиот фестивал СВП објави обемни повеќејазични буклети за секој од учесниците, кои посетителите ќе можат да добијат на настаните, со што ќе можат да стекнат и посеопфатен увид во нивното творештво.

Во улога на модератори-соговорници на учесниците на фестивалот ќе бидат неколку македонски професори, книжевни критичари и поети, како академик Влада Урошевиќ, проф. д-р Лидија Капушевска Дракулевска, проф. д-р Снежана Петрова, проф. д-р Зоран Анчевски и проф. д-р Владимир Мартиновски.

Предавањата на поетите-учесници ќе бидат организирани на Филолошкиот факултет „Блаже Конески“ во Скопје, а портретите и поетските читања во салонот „19.19“ на Културно Информативниот Центар (КИЦ) во Скопје.

За идната година планирано е проширување на Зимскиот фестивал и на универзитетите во Битола, Штип, Охрид и во Тетово.

Буклетите со програмата, избор на повеќе јазици на учесниците и био-библиографиите можете да ги преземете од линковите подолу:

ЗИМСКИ ПОЕТСКИ ФЕСТИВАЛ - буклет

Ласе Содерберг – буклет

 

Хабиб Тенгур – буклет

Хасан Зактан – буклет

 

Иван Џепароски – буклет

 

Извор: svp.org.mk

ОкоБоли главаВицФото