Ден на независните музички продавници во МКЦ

21.04.2017 10:42
Ден на независните музички продавници во МКЦ

На 22 април (сабота), МКЦ и АП(о)ТЕКА, во периодот од 13:00 до 18:00, ќе организираат дневно дружење на платото пред МКЦ, по повод International Record Store Day 2017 (Celebrating The Indie Record Store)!

Овој интернационален „Ден на независните музички продавници“ во светски рамки се одржува од 2007, а овде во Македонија, таа убава традиција годинава ќе ја организираме за прв пат.

Следејќи го генералниот концепт на прославата и Record Store Day Macedonia 2017 одлучи да има свој амбасадор, промотер на овој настан. Оваа чест, во светски рамки, секогаш е наменета за музичари кои со своите објави покажале несомнена почит и љубов кон физичките изданија (пред сѐ винилите) како доминантни носачи на звук и на овој или оној начин несебично го поддржувале опстојувањето на малите музички продавници. Водејќи се од овие основни начела, честа да биде македонски Амабасадор на годинешниот македонски Record Store Day, му ја доделуваме на Васко Атанасоски (Bernays Propaganda), најмногу поради фактот што токму тој во изминативе 15-ина години, со изданијата на некои од своите бендови (FxPxOx, Bernays Propaganda, Ха Ха Ха...) е еден од ретките македонски музичари што го одржаа винилот како релевантен носач на звук. И токму на овој ден, International Record Store Day 2017 на својата официјална страница го најави и компилациското 7” издание Support Indie Record Stores… Not Flippers, како RSD Exclusive Release, на кое со една песна е застапен и Васко Атанасоски.

Годинава, за првпат во својата десетгодишна историја, на интернационално ниво започнува да се промовира уште една почест, Worldwide Record Store Legend, за страсно колекционерство и долгогодишна поддршка на физичките изданија како носачи на звук (пред сè на винилот) и континуирана поддршка на малите и независни музички продавници. Сметавме дека кај нас, честа да биде промовиран во прва македонска Worldwide Record Store Legend, треба да му припадне на Васја Ивановски, долгогодишен пасиониран колекционер на физички изданија, редовен посетител на ретките македонски независни музички продавници, но најмногу поради неговата новинарска работа во 70-тите години од минатиот век, кога преку своите написи, а потоа и со диџеј-сетовите успеа да инфицира со музика цела армија млади, кои подоцна стануваа музичари или редовни посетители на тогаш единствените државни музички продавници. Во најмала рака, преку своите активности, стави минимум едно камче во мозаикот, кој и ден денес го составувавме, а кој ни е основа во препознатливиот урбан македонски музички идентитет.

Покрај укажувањето почит кон споменатите личности, самиот Record Store Day 2017 ќе биде одбележан и со промоција на издание, кое иако не е изготвено како RSD Exclusive Release, сепак судбината сакаше токму тоа да биде промовирано на ваков славенички ден. Се работи за винилно издание, кое по неколку параметри е сосема уникатно во целата македонска дискографска историја и на кое се поместени архивски материјали, песни што никогаш порано не биле објавени на единствен носач на звук. Според многумина, се работи за материјал што е Светиот Грал на македонската андерграунд сцена.

Задоволство ни е да ви го најавиме изданието ПАДОТ НА ВИЗАНТИЈА – Почеток и Крај, на винилен формат (LP), со бонус CD и 24 страници 12” буклет проследен со референтен историјат на групата, записи од списанија и многу оригинални фотографии.

Уште еден винил што ќе биде промовиран на 22 април е вториот албум на македонскиот гитарист, пејач и кантавтор во „Големото јаболко“, Крсте Роџевски. По извонредниот деби албум од 2015, Batania, ред е да го слушнеме и новиот, Горчливи Бадеми (Bitter Almonds). Две песни од Горчливи бадеми се дел од саундтракот за „Бикини Мун“, новиот филм на Милчо Манчевски, кој пак го дизајнираше омотот за албумот.

На самиот настан ќе бидат најавени уште неколку винилни изданија, кои ќе бидат објавени и промовирани во периодот што следува.

Целиот настан ќе биде поддржан со диџеј-сетови на Васко Атанасоски, Александар Гавровски (PMG Collective) и Гоце САФ, како и концерти на француските бендови PAUWELS, PARTOUT PARTOUT и Германците THE JEFFK.

Можност за купување винили и CD-а од АП(о)ТЕКА со специјален попуст за тој ден, од 20 % !

Подолу можете да го погледнете временскиот распоред на настапите што ќе се случуваат на платото пред МКЦ.


13:00 – 14:10 – DJ Гоце САФ

14:10 – 14:15 – Тошо Филиповски intro

14:15 – 14:20 – Амбасадор Васко Атанасоски

14:20 – 14:25 – Легенда Васја Ивановски

14:25 – 14:50 – Промоција/Преслушување на Падот на Византија – Почеток и Крај LP

14:50 – 15:15 – Промоција/Преслушување на Крстe Роџевски – Горчливи Бадеми LP

15:15 – 17:00 - DJ Гачо / DJ Васко

17:00 – 18:00 – PAUWELS (Fra) / PARTOUT PARTOUT (Fra) / THE JEFFK (Fra)

Слични содржини

Настан / Музика

ОкоБоли главаВицФото