Меѓу вечерта и утрото има само една разлика

Меѓу вечерта и утрото
Има само една разлика:
тоа е рајската птица.
Меѓу птицата и коњот
има само една разлика:
водата што страда од несоница.
Меѓу водата, воздухот и тревата
има ли некаква разлика?
Да го прашаме големиот вражалец
што ги поправа ѕвездите:
само тој ја знае разликата меѓу човекот и човекот. Ако тој се лаже
тоа е затоа што птицата е коњ,
синилото статуа, вечерта
септемвриско утро, а човекот,
наспроти себеси, скоро човек.

Превод: Влада Урошевиќ

Ален Боске (Alain Bosquet, 1919-1998), е псевдоним на Анатол Биск - фрaнцуско-белгиски поет и писател со руско потекло. Роден е во Одеса, но малку подоцна семејството му емигрира во Варна, во Софија, па набрзо во Белгија. Студира во Брисел и Париз. Во 1940 го мобилизира белгиската војска. Во 1942 заминува за Њујорк, каде што го уредува антифашистичкиот весник „La Voix de France“. Во Франција се враќа заедно со американската војска во 1944 година.

Пишувал поезија, есеи, романи - опусот му е импозантен. Мошне ценет и наградуван.