УНЕСКО бара стопирање на градењето на Галичица, или ќе го брише Охрид од листата на светско наследство

На својата официјална страница УНЕСКО побара веднаш да се стопира најавената изградба на инфраструктурни објекти на планината Галичица, или следи бришење на Охрид од листата на светско наследство.

Ова предупредување стигна по последната посета на тим експерти од УНЕСКО на ова подрачје пролетва. Во него се вели дека најавените градежни проекти „ќе доведат до неповратни промени во заштитеното природно подрачје“. Тие сметаат дека ќе биде загрозен биодиверзитетот и ќе се загади водата.

За потсетување, претходната влада на ВМРО-ДПМНЕ на чело со Никола Груевски најави изградба на голем ски-центар на Галичица, како и експресен пат од Охрид до Пештани, кој беше планирано да се гради во пазувите на оваа планина која се надвисува над Охридското Езеро.

Како по обичај, по извештајот на УНЕСКО, од локалната самоуправа во Охрид се правдаат неодредено и без да кажат конкретни активности. Градоначалникот Бакрачески во изјава за медиумите рече дека „прогресот на една заедница, на Охрид, зависи од потребите на граѓаните за развој и она што значи зачувување на природното и културното наследство“.

Во извештајот, УНЕСКО нема забелешки на зачувувањето на културното наследство на градот.

Извор: sdk.mk