1005 hPa
94 %
14 °C
Скопје - Вто, 23.04.2024 18:59
Бевме ученици, средношколци, во домот. Воспитувач ни беше еден Неле, секое попладне нè гонеше да учиме. Така беше пропишано, не смееш да мрднеш надвор кога е време за учење. Но беше меѓу нас еден Џемо – не можам да се сетам од каде беше – шегобиец, сосем откачен. Тој се осмели на строгиот и престрог воспитувач Неле, додека овој пушеше цигара во ходникот, да му го извади моливот од книгата со страницата до каде стигнал и да ја врати назад дваесетина страници.
И ништо – Неле дојде, седна и почна да чита.
Малку му беше тоа на Џемо, туку секој ден му го враќа моливот по дваесет или педесет страници, а воспитувачот Неле подеднакво си чита. Чита и чита, па со моливот ќе си забележи до каде стигнал и ќе излезе да пуши, а Џемо веднаш ќе скокне и моливот ќе го врати назад. Така со денови, така со месеци. И така четири години во нашето средно училиште, воспитувачот Неле, сериозно и задлабочено, чита една книга.
Веќе не се ни чудевме на тоа. Будала па будала.
Но еднаш, кога бевме во четврта година, и кога сите ученици знаеја за читањето на воспитувачот Неле, Џемо го помрдна неговиот молив на крајот на книгата, на претпоследниот лист.
Неле ја испуши цигарата во ходникот и влезе во читалната, седна, со вденатиот молив ја отвори книгата и нормално продолжи да чита. Ја прочита претпоследната страница, ја прочита последната и му клапна главата.
Умре.
Се сеќавам како се чудевме – го гледаме Џемо, му ги гледаме рацете, и тој самиот гледа во своите раце.
Од што ли се направени?
Превод: Лавинија Шувака
Слика: Ване Костуранов