СДСМ е црква за сенародна молитва

10.01.2018 14:53
СДСМ е црква за сенародна молитва

Би сакал да го информирам СДСМ дека од тетката на соседот на золва ми сум слушнал оти во едно село околу Битола (да не беше Кичево или Драчево?!), наводно, колку и да звучи неверојатно – а луѓе ми се колнат дека е така – постои ЕДЕН човек кому таа партија не му се допаѓа!

Јас не знам како е тоа можно, кој било, еден-единствен да е, а да не го сака СДСМ?! Бидејќи, откако дојдоа на власт, партијата направи сѐ што е во земна, надземна и, особено, подземна моќ да им се допадне на сите во Македонија, во соседството, во регионот, на континентот, во светот, па и пошироко.

Во тој напор, тие не познаваат ограничувања ниту пречка што не може да се надмине: политичките противници ги ценат многу повеќе од своите истомисленици; верниците ги сакаат неспоредливо повеќе од атеистите кои ги негуваат далеку подобро од богомолците; конзервативците ги чуваат три пати повнимателно од либералите кои им се при срце; со патриотите се натпреваруваат во патриотизам што ги надминува и највлажните патриотски соништа; невработените ги молат да се вработат на место на вработените за кои нема откази; за гладните од уста би одвоиле, а на ситите уште еден залак би им додале; на синдикалците К-15 им делат, на олигарсите тендери, на рекетарите фирми за обезбедување, на веледрогеристите нови лиценци за старите пакувања, на писателите и скрибоманите награди и признанија, на пропагандистите уште пари, на новинарите од рака им јадат, на Албанците на гради им спијат, пред странците се постилаат, на претседателот му се поклонуваат… За десните се подесни, за левите – уште полеви, што во полн круг опасно се приближуваат до крајно десните; за сиромашните се добродетели, за богатите се доброчинители; ако се гушите ќе ви дадат бесплатен превоз, ако пушите ќе ви дадат прочистен воздух…

СДСМ стана и црква и џамија и авра и капела во која има иљач за секого и молитва за сите! МПЦ и ИВЗ можат вода да им носат – а и за тоа СДСМ ќе ги обезбеди и цистерните и превозот и поздравниот говор.

Очекувам за Водици, Владата, преку специјално отворени општински канцеларии, бесплатно да дели корита и пластични турски легени за секој да може дома, без разлика на верската или неверската припадност, да си го фрли крстот во вода, да го фати, а потоа да добие државен телевизор за награда на којшто ќе може да ја следи програмата на МТВ за Велигден, Бајрам, Рамазан Бајрам, Ѓурѓовден и Видовден.

Тоа во политиката, како што е познато, се нарекува популизам. Помешан со конзервативизам и персонализам. Кај нас, пред да пропадне, се викаше Груевизам. Во социјализмот се нарекуваше комунизам: секому според потребите, од секого според можностите, минус верска настава. На минатите избори луѓето масовно гласаа за сдсизам – „Живот за сите!“ – а животот како плима ги подигна сите чамци, особено глисерите на оние кои гласаа против тоа.

Под вода, удавени, останаа приврзаниците на политичкиот идиотизам, односно некои интелектуалци, атеисти, вечни критичари и критизери, на кои оваа политика не им се допаѓа. Тие и денес инсистираат на критериуми, на стандарди, на реформи, на закони и правила, а некои, замислете, дури се дрзнуваат да потсетат дека македонската држава, според Уставот, да ти била секуларна! Срамота.

Какви злобници: сигурно барале пари, позиции и привилегии, а не им се дале! Па сега изигруваат принципиелни критичари, како на власт во Македонија сѐ уште да е Фамилијата, кога за секого имаше цена, попуст, распродажба, субвенција, поволни кредити и програми за лојалност, во кои не учествуваа само будалите кои помогнаа СДСМ да дојде на власт.

Јас мислам дека на таквите, дури и ако бараат, сега да не им се дадат државни корита за Водици, да нема каде да го фрлат и да го фатат крстот, и да останат без телевизори. И да видам, после, на што ќе ја гледаат програмата на МТВ за Велигден, Бајрам, Рамазан Бајрам, Ѓурѓовден и Видовден.

Убаво. Ова е Планот А. Кој сѐ повеќе наликува и на План Б.

Слики: Свирачиња

Извор: https://civilmedia.mk/