Мокра слика

Прекрасните денови
кога градот е налик на коцка, лепеза и птичја песна
или черупка од школка на брег
          - збогум, збогум убави девојки,
        се сретнавме денес
     и никогаш веќе нема да се видиме.

Прекрасни недели,
кога градот е налик на топка, разгледница и окарина
или ѕвонче
          - на сончевата улица
        се љубеа сенките на минувачите
     и луѓето се оддалечуваа, потполни странци.

Прекрасните вечери
кога градот е налик на ружа, шаховска плоча и виолина,
или уплакана девојка
          - игравме домино,
    домино со црни точки со мршави девојки по кафеани,
    гледајќи ги нивните колена,

истрошени и соголени
како два черепа со свилените круни на подвезиците
во очајничкото царство на љубовта.

-Јарослав Сајферт (според англискиот превод на Евалд Осерс)

Превод: П. В.