1020 hPa
55 %
16 °C
Скопје - Пет, 29.03.2024 09:50
Со панделка и со кратки чорапи,
Облеана со солзи и со бакнежи
Беше,
Пред да ти ги откријат
Бутовите и жартиерите.
Ниту мадона, ниту куртизана,
Девственица,
Штотуку зачекорана во животот
Од гоблените и вињетите.
Сега како мува-брмчалка се меткаш
По конференциските сали,
По бироата за невработени,
По новите пазари и кланици.
Зад резето наместо зад балдахин
Се тресеш.
Се влечкаш по предградијата,
Спиеш по преноќишта
Кои смрдат на краткотрајни милувања
На секс неизвалкан од љубов.
Наместо да мечтаеш
Пламната од морници и сништа,
Наместо со копитото да удираш од потсвеста.
Ги шириш висечките градини на мажјаците,
Ги шириш нозете како ластовичини крилја
Пред оној што шмрка и римува во ноќниот разговор.
Твоето тело - багаж од наслади, истрошени
Од високодостојни рими
И од глумење оргазми.
Наместо како свеќа-даровница
Да те носат по мрачните улици
И низ безгрешната уста одново да раѓаш,
Ти, залудно ја даваш својата презреаност.
Превод: Бранко Цветковски