ДРУГА ПРИКАЗНА - трет пат, од 6 до 9 септември 018

03.08.2018 17:21
ДРУГА ПРИКАЗНА - трет пат, од 6 до 8 септември 018

Третото издание на книжевниот фестивал „Друга приказна“ ќе се случи од 6 до 9 септември 2018 во Музејот на современа уметност во Скопје.

Овде е ПРОГРАМАТА.

Добитничка на главната награда е хрватската писателка Оља Савичевиќ Иванчевиќ.

Главната тема на фестивалот е: Идентитетот како претстава.

Учесници на фестивалот ќе бидат триесетина писатели и теоретичари од регионот и од нашата земја. Своето учество досега го потврдија следниве учесници од регионот:

Оља Савичевиќ Иванчевиќ, Сибила Петлевски, Радмила Лазиќ, Марко Погачар, Шпетим Селмани, Биљана Космогина, Енес Халиловиќ, Драган Протиќ, Дејан Илиќ, Иван Димитров, Даница Вукичевиќ, Петра Митиќ, Стефан Бошковиќ, Тања Ступар-Трифуновиќ, Стефан Митиќ, Станимир Панајотов, Дејан ИлиќИнга Жолуде...

Специјален гостин на фестивалот ќе биде белградскиот поп електро бенд ЕПП.


Главната фестивалска тема, „Идентитетот како претстава“, ја избравме, меѓу другото, и за да дадеме придонес во кампањата која во септември ќе биде актуелна кај нас, пред референдумот за промена на името на државата и за влегување во ЕУ и НАТО. Несомнено е дека нашите позиции, и како поединци и како фестивал, се проевропски и во насока на поврзувања, регионални и глобални. Се разбира и дека нашата позиција е повеќе културно-уметничка отколку политичка, но преплетот на тие позиции некогаш е неизбежен, а некогаш и продуктивен. Темата, се разбира, е многу поширока и опфаќа уметнички, родови, медицински, филозофски, естрадни, маркетиншки итн. аспекти. Затоа ни се виде добра (соодветна, провокативна, поттикнувачка) за нашиот фестивал.

***

ДРУГА ПРИКАЗНА е скопски книжевен фестивал за мали фикции. Првото издание се случи во 2016 година. Фестивалот произлезе од потребата за друга приказна насекаде: во книжевноста, културата, политиката - во целото општество.

Меѓу поважните цели на фестивалот се популаризација на книжевноста; преиспитување на улогата на книжевноста во општеството; преиспитување на жанровските граници, на релациите меѓу „популарното“ и „елитното“, „високото“ и „ниското“, ангажираното и ескапистичкото; преиспитување на улогата на писателот во новите локални и глобални контексти; осмислување и практикување на нови стратегии за културни поврзувања и локално и регионално и глобално; вмрежување на македонските автори и искуства во регионален контекст; збогатување на скопската културна понуда...

Поднасловот на фестивалот, Мали фикции, значи дека примарен интерес се малите книжевни форми, згодни за јавно и сценско споделување. Но, тука се и хибридните книжевни форми, местата каде што книжевноста се среќава со музиката, графиката, медиумите, естрадата, теоријата...

Следниве недели на Окно ќе објавиме повеќе прилози за програмата, темата и учесниците на овогодинешниот фестивал.

Фотографијата на насловната страница и клипот преземени се од филмот Балавица (Игор Мирковиќ, 2013), направен според расказ на Оља Савичевиќ Иванчевиќ. Филмот ќе биде прикажан во рамките на овогодинешниот фестивал Друга приказна

Слични содржини

ОкоБоли главаВицФото