1003 hPa
43 %
22 °C
Скопје - Сре, 24.04.2024 17:59
Младата, талентирана модна дизајнерка Теодора Митровска од Лондон, преку Рига, Латвија каде учествуваше на Модната недела, се враќа во Скопје со колекцијата „We are not machines“, која ќе ја претстави на 2 ноември (петок) во хотелот „Мериот“ во рамките на 18-от Скопски моден викенд (FWSK).
Митровска ја промовира колекцијата „We are not machines" која носи силен анагажиран и етички предзнак бидејќи го адресира проблемот на експлоатација и ефтината работна сила во текстилните фабрики на земјите од третиот свет и го поставува прашањето: кога работникот преминува во машина, од етички и физички аспект.
Моделите во својата естетика силно се поврзани со работничката униформа на текстилните работници, притоа со акцент на нивната мултифункционалност и повеќеслојност. Колекцијата е создадена да се прилагоди на разните женски облици и големини, а истовремено е родово неутрална. Го допира прашањето и на брзата мода и конзумеризмот. Колекцијата е концептуална и наменета за млади, авангардни луѓе кои сакаат улична мода со печат на ексцентричност.
„Би сакала да изразам огромна благодарност до Кристина Ампева, основач на „Гласен Текстилец“, чија животна приказна и дејност како дел организацијата беа главна инспирација за колекцијата. Исто така благодарност и до Soul Case , чија музика ќе биде дел од перформансот во петок, а беше дел и од ревијата во Рига“, вели Теодора.
Инаку, таа годинава дипломираше на модните студии на „Middlesex University“ во Лондон.
Фотографии: Архива на Теодора Митровска