Температурата во иднина

Во полскиот град Катовице, познат по мошне ниските температури, каде во изминатите два века се ископуваше камен јаглен и се правеше челик, оваа недела од сите краишта од планетата доаѓаат политичари, научници, еколошки активисти, новинари и сите останати кои се занимаваат со климатските промени.

Имено, таму се одржува традиционалната годишна конференција на Обединетите нации за климатските промени (ЦОП24), а досега на таквите конференции се донесуваа сите пресвртни одлуки во врска со не толку успешната борба против глобалното затоплување. „Климатските промени се најголемата закана за човештвото во последните илјада години“, од Катовице порачува славниот природонаучник Дејвид Атенборо.

Научните истражувања во последниот половина век недвосмислено покажуваат дека до глобално загревање доаѓа затоа што во атмосферата е зголемена концентрацијата на јаглен диоксид затоа што човекот согорува фосилни горива како јагленот кој од средината на 19 век се ископувал ширум развиениот свет, па така и во рудниците во Катовице.

Според последниот извештај на Меѓувладиниот панел за климатски промени (ИПЦЦ), зголемувањето на средната глобална температура до крајот на векот не смее да биде повисока од 1,5 степени целзиусови. Во спротивно, ефектите од глобалното затоплување ќе бидат катастрофални и донекаде непредвидливи. Меѓутоа, моменталната статистика ни малку не ветува дека таа цел лесно може да се постигне.

Ако државите не би преземале ништо, климатолозите проценуваат дека растот на средната температура до крајот на векот би бил дури 4,5 степени целзиусови што би значело дека планетата би била едно изразено негостопримливо место. Можеби толкавото зголемување не ви звучи драматично, но на глобално ниво би значело толку што повеќето градови би биле под вода, а остатокот од денешните населени области би бил претворен во пустина.

За среќа, благодарение на конвенцијата на Обединетите нации за климатски промени, некои мерки сепак се преземаат во последните децении и ако ваквата практика би продолжила на ист начин, експертите проценуваат дека растот на температурата би бил за 3,5 степени целзиусови. Ова малку подобро сценарио би значело на пример дека Европа не би била помлаку пријатна за живот од Сахара денес.

За жал, нештата би биле само за нијанса подобри дури и ако владите на државите навистина би ги спровеле мерките на кои се обврзале. Во тој случај очекуваниот раст на средната глобална температура би бил 2,9 степени целзиусови. Тоа би значело драматично зголемување на силата на непогодите, топлотните бранови, животот меѓу долгите суши и големите поплави и пораст на морето кој ќе поплави многу градови со крајбрежјето. Сите овие неволји би биле проследени и со недостаток на храна заради драстичното намалување на плодните површини, но и речиси сигурно изумирање на огромниот број растителни и животински видови.

Последната студија што ја објави Програмата за животна средина на Обединетите нации со наслов „Emissions gap report 2018“ покажува дека, за жал, опасноста не се намалува туку оди во спротивна насока. Имено, после 4 години стагнација, емисијата на јаглерод диоксид повторно е во пораст. Повеќе од 60 проценти од вкупните емисии на гасови со ефект на стаклена градина, а пред сè јаглеродниот диоксид, ги произведуваат десетте најразвиени земји на светот меѓу кои рекордот од 26,6 проценти го држи Кина зад која е Америка со 13,1 процент.

Меѓутоа, климатските активисти во последните две години особено ги истакнуваат негативните ефекти од политиката на американскиот претседател Доналд Трамп кој се повлече од Парискиот договор, а тоа ги оштети напорите остатокот од светот да преземе поголеми обврски во намалувањето на емисијата. Оваа околност дури и во научните трудови се вика „ефектот Трамп“.

За време на минатогодишната климатска конференција која се одржа во Бон, во Германија, администрацијата на Трамп организираше паралелен настан во истиот град на кој го промовираше согорувањето јаглен за добивање енергија, што го предизвика гневот на климатските активисти ширум светот.

03.12.2018

Извор: http://naukakrozprice.rs