1007 hPa
94 %
11 °C
Скопје - Чет, 25.04.2024 18:59
На Лилјана Дирјан (1954 – 2017)
Ми идеш на сон седната под водопад
од ѕвезди и ми велиш намуртено:
„Што бараш ти тука?
Зарем и ти се пресели
од твојата сончева градина
во оваа сенишна прашума?“
„Не, јас го превртев сал мракот во ден,
минатото во сега, ко песочен часовник,
за ситно да сее време и гласови, сѐ дури
зборовите од твојот секнат бунар
не исцедат јадри капки бистра вода
во кои пак ќе се капе сончевиот лач.
Ги испеглав езерските далги
во крупни ленти тешка свила
и посеав нови алги долж брегот
за мастило со кое врз неа ќе пишуваш
стихови отаде заборавот-волк –
тој молчалив демнач низ годините.
Ти знаеше дека песната не се раѓа
за ропство во занданите на зимата.
Ја грееше в пазуви ко свилена буба,
ја учеше да лета ко ластовица, ја селеше
во приемчиви градини. Сега идам тука
со скромна понада за тебе од мојата:
кадарните ги бирам ко зрели плодови,
некадарните не! – ги плевам ко троскот,
ги требам ко гниди за спас на денот
со моќна нежност што иде од глаголите
и именките за часовите во него
да ги направам подносливи пред ноќта,
пред љубопитниот лик да ми се нурне
во стапалките на тие што веќе заминале
и зад себе оставиле несетена,
невкусена,
немерлива
невиност“.