пристапност на искуството: дупка

ќе ја наполниш со кока-кола. ќе седнеш
пред телевизорот. можeш и со пиво.
ќе ѝ додадеш уште нокаутирана вештица и коктел
од врескави аријаднини нишки.
и ќе мешаш пред неа дење и ноќе,
shake baby shake, сѐ додека не ѝ се
заврти пред очи и не свисне.
може и со лозова. ќе ѝ дадеш слика на
fair-play во живо. дриблаш околу неа
и сè пред себе превртуваш, живо
и женско, хартиено и метално,
додека не заплеска со закржлавените рачиња,
восхитена без игра и крај.
можеш и со трпезариско вино. трпезариски тенис.
трпезариски вазни. трпезариско грозје. трпезариски
маси. столови, теписи, полици,
излози, постери, натписи, ќе купиш x
ќе добиеш y, да купуваме домашно, да купуваме смешно,
да купуваме слон, да купиме време, да се купуваме
себеси, грицкај чипи-чипс, сопри малку!
и со слики
и со слики
и со слики
полни, трупај, набивај, долевај;
ох, колку е мала таа дупка, би можела
брзо да залелекам: помош, претоварена сум,
и да речам: леле! но во себе, сосем неосетно.
демократски ѝ ја сервираш помислата дека
навистина уште што не може да збере,
а таа пак верува дека е празна.

Превод: Славе Ѓорѓо Димоски