за вашиот комфор и вашата сигурност

градиме брза пруга и произведуваме возови
што се навалуваат и се лизгаат како по средство против коров
за вашиот комфор и вашата сигурност
ги преуредуваме трамвајските постојки и ставаме
дигитални паноа за да се види кога трамвајот доаѓа
и да не се гледа тенката иноксна пречка што на момчето
на велосипед во вратот трајно му го врежува ѓерданот
за вашиот комфор и вашата сигурност
го утврдуваме градот со бедеми од трговски центри
за да има каде да се сокриете и лете и зиме
за да не морате децата да ги водите на езеро
кај што е страшно и опасно, или во парк,
иако и нив ги обложивме со мека пена
модринките се out, можеме да ве пријавиме за малтретирање
за вашиот комфор и вашата сигурност
ставивме камери на раскрсниците
ја засиливме полициската безбедност обезбедувањето
веќе стои пред сите врати
за вашиот комфор и вашата сигурност
смисливме и патувања без ризик
и љубовни средби без ризик
и војни без ризик, за нашите момци, секако
не можат цел живот да висат на play station
а ниту paint-ball не е за вистински фраер
за вашиот комфор и вашата сигурност
ви нудиме сѐ поголеми телевизори
политички спектакли и гратис општества
потврдена наслада, гаранција доживотна
за вашиот комфор и вашата сигурност
ви нудиме во пакет сè повеќе
купуваш две добиваш три, дупло, сè мора да отиде,
акција, имате ли наша картичка, оставете податоци
за вашиот комфор и вашата сигурност
ќе ви влеземе во трага и добро ќе проучиме кои сте
за вашата сигурност сигурност сигурност
за вашиот комфор бидејќи се грижиме за вас
бидејќи ние сме сигурен партнер бидејќи ние знаеме подобро
бидејќи тука е човекот
човек
тука е

Превод: Славе Ѓорѓо Димоски