Почина хрватскиот оскаровец Бранко Лустиг

14.11.2019 18:05
Почина хрватскиот оскаровец Бранко Лустиг

Бранко Лустиг, продуцент и двократен добитник на Оскар, почина денеска во Загреб во 87-та година од животот.

Лустиг двата Оскари ги доби за филмовите „Шиндлеровата листа“ во 1993 година и за „Гладијатор“ во 2000 година.

Поради еврејското потекло, за време на Втората светска војна бил затворен во концентрационите логори Аушвиц и Берген Белсен. Голем број членови на неговото семејство изчезнале низ концентрационите логори низ Европа, меѓу кои и неговата баба која биле убиена во гасна комора, а таткото бил убиен во Чаковец. Неговото животно искуство со логорите е вградено во филмот „Шиндлерова листа“.

Лустиг е роден во Осиек во 1932, во 1955 дипломирал глума на Академијата за драмски уметности во Загреб, а истата година ја почнал професионалната кариера во загрепскиот „Јадран филм“. Набрзо потоа, Лустиг бил ангажиран во речиси сите филмски продукции на просторите на бивша Југославија.

Лустиг поминал повеќе од 50 години во филмската индустрија. Во 1970-те почнал да работи на странски копродукции, кои во 1980-те го однеле во Лос Анџелес. Таму го запознал Стивен Спилберг, со кого го снимија „Шиндлерова листта“, освои Оскар и стана влијателен продуцент во Холивуд. Работеше на „Миротворец“ со Џорџ Клуни и Никол Кидман што во 1997 се снимаше и во Македонија, a по Оскарот за „Гладијатор“ на Ридли Скот, со него работел и на филмовите: „Ханибал“, „Падот на црниот јастреб“, „Небесно царство“, „Добра година“ и „Американски гангстер“.

Лустиг пред десет години се врати во Хрватска, каде беше директор на Фестивалот на толеранција – Фестивал на еврејски филм. Изминативе години беше прогласен за почесен граѓанин на Осиек, Чаковец и на Загреб, а добитник е и на државни ордени и признанија. Во 2014 доби француски орден Витез на уметноста и книжевноста, а истата година се најде на листата на 50 најдобри филмски продуценти на сите времиња.

Како преживеан од Аушвиц, Лустиг во 2015 година го подари Оскарот за „Шиндлеровата листа“ на Музејот на холокаустот Јад Вашем во Ерусалим.

 

Слични содржини

ОкоБоли главаВицФото