1006 hPa
62 %
13 °C
Скопје - Чет, 25.04.2024 00:57
Во глупоста, тој е сериозен дух кој, ако е подобро насочен, би можел да го зголеми количеството на ремек-дела.
*
Без нашите сомнежи во себе, нашиот скептицизам би бил мртва буква на хартија, конвенционално неспокојство, филозофска доктрина.
*
Историјата на идеите е историја на осветољубието на самотниците.
*
Шекспир: љубовен состанок на ружата и секирата...
*
Секоја реч болно ме погодува. Колку, сепак, би ми било попријатно да го слушам брборењето на цветовите за смртта.
*
Модели на стилот: пцост, телеграм и епитаф.
*
Книгата која, откако демолирала сè, не се демолира и себеси, залудно нè огорчува.
*
Песимистот секој ден мора да измислува нови причини за постоење: тоа е жртвата на „смислата“ на животот.
*
Секоја мисла би морала да евоцира урнатина на некое смеење.
*
Во овој минлив свет, нашите аксиоми имаа вредност само како мали новински вести.
*
Приговор кон науката: овој свет не заслужува да биде сфатен.
*
Кога продлабочувате некоја идеја, и’ нанесувате штета: и’ ја одземате привлечноста, имено животот...
*
Ја вкусивме опиеноста од крајностите, и застанавме некаде меѓу дилетантизмот и динамитот!
*
Со секоја идејата која ќе се роди во нас, нешто во нас гние.
*
Колку ми е само блиска онаа луда старица која трчаше по времето, која сакаше да улови парче од времето!
*
Донесувам одлука исправено: легнувам и – ја поништувам.
*
Со животот се склопува договор само кога се кажува – со целото срце – некоја баналност.
*
Секоја вода ја има бојата на давењето.
*
Никој нека не се обидува да живее ако не ја поминал обуката за жртва.
*
Да се надеваш значи да ја демантираш иднината.
*
Кога би верувал во Бог, мојата заслепеност не би имала граници: би се шетал гол низ улиците...
*
Не Бог, туку Болката ја ужива предноста на сеприсутноста.
*
Како и секој иконокласт, ги скршив своите идоли за жртвата да ја принесам на нивните урнатини.
*
Создавањето на светот бил првиот чин на саботажа.
*
Според барањето на маките, според стремењето по болката, љубоморниот човек му конкурира на маченикот. Меѓутоа, едниот го канонизираме, а другиот го исмеваме.
*
Колку повеќе духот се откажува од сè толку повеќе ризикува, кога љубовта ќе го погоди, да реагира како срамежлива девојка.
*
Зошто да му се обраќаме на Платон кога некој саксофон може подеднакво добро да ни навести друг свет?
*
Еволуција: во нашите денови, Прометеј би бил пратеник на опозицијата.
*
Слободата е врвно добро единствено за оние кои ги поттикнува волјата да бидат еретици.
*
Историја – тој динамизам на жртвите.
*
Кој не ја гледа смртта во розовото, боледува од далтонизмот на срцето.
*
Последното прибежиште на оние кои ги погодила судбината е идејата за судбината.
Извор: Emil Cioran: Syllogismes de l’amertume
Од Сиоран прочитајте го и текстот: Тетратки (1957-1972)
Слика: Лусиан Фројд