Рана (монолог на медуза)

Здраво е да пецнеш некого. Да го потсетиш дека е ранлив и кршлив. Макар и малку! Дека паметот му лета во облаци.

Не им верувам на луѓето што не знаат да пецнат или да издржат болка. На луѓето без рани и лузни. Кои знаат само да (се) фалат.

А ако веќе се перчиш, кажи дека не ставаш веднаш песок и оцет врз рана. Пливај во длабокото и слободно нурни!

Ако налеташ на мене, ветувам дека ќе те пецнам сосема нежно. А ти вети ми дека ќе ме паметиш и кога ќе зацели твојата рана.

А и кога ќе останеш сама.