Ние сме со жртвите на овој случај на родово базирано насилство

Денес се огласија моралните и верските судии за случајот Јавна соба, барајќи ја вината за групата на Телеграм со повеќе од 7000 членови во таканаречената морална дисторзија и губењето на семејните вредности, но без гласно да застанат на страна на стотиците девојки и жени чии фотографии и видеа беа злоупотребувани во групата.

Ние сме со жртвите на овој случај на родово базирано насилство кое бараме да биде така именувано и адресирано од институциите, а особено од Министерката за труд и социјална политика.

Ние сме со жртвите, без разлика дали се малолетни, полнолетни, вернички, атеистки, анархистки, транс жени, мајки, лезбејки, сексуални работнички, политичарки, итн.

Изјавите и пораките кои јасно и недвосмислено не ги осудуваат администраторите и членовите на ваквите групи вршат двојна виктимизација на жртвите, се во спротивност со залагањата за заштита од родово базираното насилство и вознемирување и се спротивни на духот на Истанбулската конвенција.

#сонеасме, Фејсбук, 28.01.20.