1014 hPa
76 %
11 °C
Скопје - Вто, 19.03.2024 08:56
Вчера, на 10.02.20., во скопското кафуле „Гаврош“ беа доделени наградите од втората „годишна награда за стрип Лифт“, за 2019 година. На настанот беа прикажани и таблите на трите најдобро оценети стрипови:
„Reborn“ од Јована Велинова;
„Hope“ од Џошкун Алиевски;
„Си беше еднаш еден човек“ од Александар Стеванов и Дарко Богданов.
Во име на жирито (Јана Јакимовска, Владимир Битољану и Никола Гелевски) на настанот зборуваше Гелевски, образложувајќи ги одлуките на жирито.
Во уводот на книгата во која се претставени сите десет стрипови пристигнати на конкурсот пишува:
„Радува што повеќето стрипови пристигнати на конкурсот се мошне солидни. Радува и шаренилото на темите и пристапите: меѓу десетте стрипови има и типични жанровски дела (Hope, Ironheart, Вулгарин...), уметнички експерименти (Дада, Мирен сон, -1С...), ангажирани дела (Синдром здрвување), психолошки и лирски записи со примеса на научна фантастика (Reborn)... Трите најдобро оценети стрипа само за нијанса се издвоија од другите (интересно е што дури осум стрипа, од десетте, добија по некој поен од четиричленото жири - што зборува за воедначеноста на конкуренцијата). Затоа ги охрабруваме и другите луѓе кои се занимаваат со стрип (не само почетниците и младите, туку сите!) годиниве пред нас да ни ги испраќаат своите дела. Така ќе ја зајакнуваме важноста на оваа награда, но, уште поважно, ќе ја зајакнуваме и релативно слабата македонска стрип сцена.“
Наградниот фонд на наградата Лифт изнесува 500 евра, но во книги, изданија на Темплум и Бункер. Гелевски вели: „Жал ни е што не обезбедивме парични награди, но такви се (мрачни) економските состојби во кои овде живееме низ годиниве. Што, се разбира, не нè спречува и понатаму да ги буткаме работите кои ги сметаме за важни и кои (и заради тоа се важни) можат барем малкуцка да ја променат земјава на подобро.“
Во продолжение од настанот пренесуваме десетина фотографии на Небојша Гелевски.
Јована Велинова
Џошкун Алиевски
Фотографии: Небојша Гелевски