1005 hPa
87 %
10 °C
Скопје - Чет, 25.04.2024 03:59
На денешен ден во стариот Рим почнувале Флоралиите (лат. Floralia) - игри во чест на Флора, божицата на цвеќињата, вегетацијата и плодноста. Флора, на македонски Цвета (од flos ‘цвет), е многу древно италско божество, едно од најстарите во римската религија.
На Флоралиите се прикажувале театарски претстави - комедии и мимови, се одржувале ритуални трки со зајци и кози и гладијаторски претстави во кои жени, како од мајка родени, танцувале и се бореле. Шест дена, колку што траеле Флоралиите, насекаде низ Рим летале зрна грашок и грав, кои се сметале за симбол на плодноста. Светониј пишува дека во 30 год. н.е., кога идниот император Галба бил претор, за време на Флоралиите била приредена дотогаш невидена претстава - слонови што одат по жица.
Слика: Нилола Пусан, „Триумфот на Флора“ (1627/28 г.), Лувр, Париз