Хелсиншкиот комитет и „Гласен текстилец“ бараат забрана за работа за време на полицискиот час

Хелсиншкиот комитет за човекови права и „Гласен Текстилец“, остро реагираат на најавите дека повеќе текстилни фабрики во Штип ќе работат за време на полицискиот час во викендот што следи.

Оттаму велат дека согласно добиените информации од терен, фабриките веќе извадиле или се во процес на вадење дозволи за работа, а работодавачите им најавиле на своите вработени дека ќе работат за време на полицискиот час.

„За да се заштити здравјето и животот на текстилните работнички, а во насока на превенција и справување со ширењето за вирусот, бараме од Владата на Република Северна Македонија да воведе целосна забрана за работа на текстилните фабрики во Штип за време на полицискиот час. Очекуваме Државниот инспекторат за труд и Државниот санитарен и здравствен инспекторат и понатаму будно да ја следат состојбата на терен и да ги санкционираат сите работодавачи кои нема да се придржуваат до мерките“, се вели во соопштението.

Според нив, работењето за време на полицискиот час, во денови кога најмногу прогресира бројот на заболени во земјава од почетокот на пандемијата, е крајно неодговорна одлука која директно ги загрозува здравјето и животот на текстилните работнички.

Од Хелсиншкиот комитет велат дека одлуката доаѓа во време кога е потребна најголема општествена одговорност и солидарност од работодавачите, институциите и работниците.

„Недозволиво е во град, кој ќе биде под 80 часовен карантин како резултат на зголемувањето на бројот на заразени со вирусот, од кои најголем број доаѓаат од текстилната индустрија, да се дозволи работа на текстилните фабрики“, нагласуваат тие.

Во соопштението се нагласува дека загрижувачки е што најголемите прекршувања на превентивните мерки за заштита и спречување на ширењето на вирусот во Штип се случуваа при превоз на текстилните работнички за време на полициски час, во несоодветни автобуси, со непочитување на одредбата за смалување на капацитетот за превоз на 50% од Уредбата за јавен превоз на патници и неможноста да се одржува препорачаната дистанца.