Слободата е глагол

Љубовта е глагол
Од и за Мо вон Памел

бришана песна

Слободата не е славно сеќавање на споменикот
Слободата не е празен збор на политичарот
Слободата не е точка или остар извичник на законикот
Слободата не е мртво значење на именката
Во Речникот на словенечкиот литературен јазик
Слободата е жива крв, крило, раскриленост на крикот

Слободата не е бункер од тони бетон
Слободата не е гомно од бесмртна бронза
Слободата не е бегство, илузија на балонот
Слободата е помалку и повеќе е од законот
Слободата е ништо и слободата е круна

Слободата се смее, се менува и сонува
Слободата е сегашна и секогаш без дно
Слободата е здив и зрак што го чува
Делото посилно од злото на разорувањето

Слободата не е непроменлив устрој
Слободата не ни е гарантирана од државата
Слободата е поскапа, слободата е став

Слободата не е позната, непознат пат е, овде, пред прагот
Слободата е глас, смртно ранет и гол

Слободата е глагол, слободата е глагол

Препев: Лидија Димковска

Борис А. Новак, роден во 1953 год., во Белград, каде го има поминато детството. Живее во Љубљана и работи како редовен професор на Катедрата за компаративна книжевност и книжевна теорија на Универзитетот во Љубљана. Од 1991 год. е активен во словенечкиот и во меѓународниот ПЕН центар и е еден од најангажираните словенечки писатели во одбрана на човековите права и слободи во Словенија. Во 90-тите организирал помош за бегалците од некогашна Југославија и за писателите на опколеното Сараево. Пишува поезија и драми за возрасни и деца, преведува од француски, англиски, холандски, италијански, германски и од јужнословенските јазици. Објавил повеќе од 20 поетски книги за кои ги добил највисоките книжевни награди: „Златна птица“, „Прешерн“, „Јенко“, „Левстик“, „Вероника“, „Жупанчич“ и др. Во периодот од 2014 до 2017 год. го објави првиот монументален словенечки еп „Врата на неповратот“ во три книги на 2300 страници за кој доби пет поетски словенечки награди.