Ти не знаеш што е тоа поезија

10.08.2020 10:46

дури и кога те удира со чекан
и ти го крши черепот,
дури и кога пее гласно
со срп, земја и пот,
дури и кога расте со години
и цветови и годови,
дури и кога создава
соѕвездија или сводови.
Ти не знаеш што е тоа поезија
дури и кога ти вика 'мамо'
и си ги раскрварува колената,
ти не знаеш што е тоа поезија
дури и кога се обидува да
ти ја најде вената,
дури и кога ја носи твојата облека
и го краде твоето име
и ги крши сите твои огледала
и затоа имаш веќе седум години
несреќа.
Ти не знаеш што е тоа поезија
дури и кога расте во тебе
како тумор,
дури и кога ти се додворува
како несоница на умор,
дури и кога ти повторува
дека не знаеш што е тоа поезија,
дури и додека го уништува човештвото
како свилена апокалипса
дури и кога ти ја пали цигарата
дури и кога ти бара десет денари
додека го чекаш семафорот
да се промени
(иако знаеш дека никој
никогаш не се менува)
ти не знаеш што е тоа поезија
дури и кога разденува,
дури и кога експлодира како
отровна црвена печурка
над закопани лаги
во Бејрут,
дури и кога вреска наоколу
како некој
кој е лут,
дури и кога молчи тврдоглаво
како некој
кој е луд,
дури и кога удира со чекан
како да си прогласен 'виновен'
пред нејзиниот суд.

 

Слични содржини

нема
Секој ден песна
нема
Секој ден песна
нема
Секој ден песна
нема
Секој ден песна
нема
Секој ден песна
нема
Секој ден песна
нема
Секој ден песна

ОкоБоли главаВицФото