Утре човештвото ќе ги потроши резервите на планетата за оваа година

Човештвото ќе ги потроши сите расположливи обновливи природни резерви на Земјата за 2020 година до утре (сабота, 21 август, 2020), според научниците кои посочуваат дека овој праг е достигнат малку подоцна од минатата година, бидејќи пандемијата на коронавирусот го забави неконтролираното исцрпување на природните резерви, пренесува „Ал Џазира Балканс“.

Таканаречениот Ден на надминување на Земјата го означува денот кога човештвото ги „потрошило“ сите биолошки резерви кои Земјата е во можност да ги обновува од година во година.

Тој ден од 1970 година се случува се порано според мрежата „Global Footprint Network“. Тие пресметале дека точката оваа година е достигната на 22 август, во споредба со минатата година кога е достигната на 29 јули, што означува редок случај на пресврт на трендот откако пандемијата го запре животот и предизвика привремен пад на емисиите на стакленички гасови и уништувањето на шумите.

Ова претставува намалување од 9,3 отсто на влијанието на луѓето во однос на годината претходно, велат од Мрежата.

Но, тоа не е нешто што треба да се слави, изјави вчера претседателот на мрежата Матис Вакернагел.

„Тоа не е резултат на свесна одлука, туку на катастрофа“, додаде тој.

„Научниците го пресметуваат денот кога човештвото ги троши сите природни резерви што Земјата успева да ги обновува секоја година, проучувајќи ја човековата потрошувачка и потребите за храна, енергија, просторот за домаќинствата и патиштата, т.е. капацитетите на планетата да ги апсорбира глобалните емисии на стакленички гасови“, вели Вакернагел.

Извор: Ал Џазира Балканс