Грозовилата приредува книжевна чајанка (фотографии)

Во саботата, на 5-ти септември, во рамки на фестивалот за детска книжевност „Друга приказна“, се одржа книжевна работилница за деца насловена „Грозовилата приредува книжевна чајанка“. Интересот за работилницата беше голем и сите места беа брзо пополнети.

Идејата на работилницата беше негување на љубовта кон читањето кај децата и поттикнување на критичко размислување. Децата беа поделени во неколку мали групи во кои заеднички читаа, разговараа за прочитаното и раскажуваа сопствени приказни.

Работилницата се одржи во паркчето пред платото пред Младинскиот културен центар во Скопје, среде игривата инсталација уредена од уметниците Доротеј Нешовски и Ѓорѓе Јовановиќ.

Учесниците на чајанката заедно со книгите се послужија со чајчиња и чајни колачиња.

Некои од книгите за деца и сликовниците кои се читаа беа „Глувци и мачки наопачки“ од Луко Паљетак и Александар Иванов (Темплум), „Ѕвезда Мрак и суштествата од Страшкоград“ од Билјана Црвенковска и Нита Муча (Чудна шума), „Грозовилата во Страшната шума“ од Јана Бауер и Керолај Тау (Артконект), „Сонувалко“ од Сања Михајловиќ-Костадиновска (Бегемот) и „Ѕверче од бои“ од Ана Лјенас (Сказнувалка).

Аниматори на чајанката беа Никола Гелевски, Билјана Црвенковска, Симона Спирковска, Искра Димковска и Доротеј Нешовски.

По работилницата, гостите на фестивалот имаа можност да го проследат групнииот концерт „Мојата омилена песна за деца“ во кој настапуваа петнаесетина домашни музичари.