1012 hPa
100 %
5 °C
Скопје - Чет, 18.04.2024 22:59
Таванот е за куќата
како за човека главата -
довека ја држи исправена ставата!
Во сандакот среде таванскиот мрак,
под шубарите и волнените доколеници
ѕиркаат востаничките реденици.
А крај оџакот начаден
во тесното таванско сопче,
го лулаат пајажини црешовото топче.
За нашите буни и востанија
против султанот и бејот,
повеќе знае таванот отколку музејот!
Затоа, се накриви ли таванската глава,
треба да се променат итно и плански
гнилите греди оломлански!
Со кубик штици, чекан, шајки
и две-три борови греди,
накривеното итно да се среди!
Зашто таванот е стара книга,
возбудено напишана сторија,
за куќата, за семејната историја.
Таванот е за куќата
како за човека главата -
довека ја држи исправена ставата!
Владимир Шопов (1948-2000) - македонски поет, критичар, публицист хроничар, писател, хуморист и сатиричар. Пишувал поезија и на англиски јазик. Човек со широка лепеза на творечко интересирање, се занимавал и со концептуална уметност.
Негов татко е Ацо Шопов, еден од најпознатите современи македонски поети, а неговата мајка е Благородна Цветковска, сестра на народниот херој Здравко Цветковски.