Чиста околина го објавија синглот „Малку поети“

Откако го најавија своето враќање на сцената со експлозивната „Си играме со рапот“, македонските хип-хоп ветерани денеска го објавија и вториот сингл од новиот албум „Avant-garde Fatiguée”.

За разлика од остриот гитарски звук на претходникот, „Малку поети“ кокетира со шлагерскиот поп од седумдесеттите години на минатиот век. Во песната се искористени семплови од класиката „Зошто“ на Зафир Хаџиманов, но за оваа пригода таа е ставена во хип-хоп бум-бап контекст.

На „Малку поети“, на Чиста околина им гостуваат колегите од легендарниот хип-хоп колектив САФ - Смилени Диџеј Гоце (кој е и продуцент на песната), како и можеби најистакнатиот претставник на новата хип-хоп генерација, ЛД Пистолеро. Новиот албум на Чиста околина, “Avant-garde Fatiguée” ќе излезе во мај. Издавач е „Филтер Лебел“.