Французите Лакатон и Васал се добитници на Прицкеровата награда за архитектура

Француските архитекти Ан Лакатон и Жан-Филип Васал, основачи на студиото „Лакатон и Васал“, се добитници на годинашната Прицкерова награда, која е највисоко признание во архитектурата. Тие се познати по многубројните одржливи проекти за домување и галеријата за современа уметност „Палата Токио“ во Париз. Заедно реализирале повеќе од 30 проекти во Европа и Западна Африка.

Во 1987 година во Париз го основаат архитектонското биро „Lacaton & Vassal“ и оттогаш со смелост ги почнуваат нивните проекти на нови згради и трансформативните проекти. Повеќе од три децении тие проектираат приватни и социјални станови, културни и академски институции, јавен простор и урбанистички стратегии. Архитектурата на овој двоец е одраз на нивната посветеност и застапување на социјална правда и одржливост, со приоритет на давање предност на просторна дарежливост и слободата на користење, преку економични и еколошки материјали.

„Зградите се убави кога луѓето се чувствуваат добро во нив. Архитектурата не треба да биде наметлива, туку треба да биде корисна и убава и тивко да го поддржува животот што ќе се одвива во неа“, изјави Лакатон.

Соопштувајќи ги имињата на добитниците, Том Прицкер, претседателот на фондацијата „Хајат“, изјави дека приоритет на Лакатон и Васал секогаш бил да го збогатуваат човечкиот живот, што имало придобивки за поединецот и ја поддржувало еволуцијата на градовите.