Седмо издание на „Битрикс танцова лига“

17.10.2021 12:39
Седмо издание на „Битрикс танцова лига“

Во Младинскиот културен центар на 16 и 17 октомври се одржува седмото издание на интернационалниот танцов камп „Битрикс танцова лига“, во организација на Битрикс културен центар.

Фестивалот веќе седум години се стреми да ја доближи до јавноста уличната култура, со посебен фокус на танцовата уметност, притоа остварувајќи богата програма за млади и етаблирани изведувачи.

Досега „Битрикс танцова лига” била домаќин на гости од САД, Англија, Холандија, Италија, Швајцарија, Грција, Естонија, Украина, Србија, Словенија, Бугарија.

Годинашното издание вклучува танцови работилници со гостите предавачи од Франција – Aurelien Collewet – Biscuit, Србија – Никола Планка и Грција – Maria Youme, кои ќе бидат отворени за пријавените учесници на кампот.

Дополнително, во МКЦ се реализираат и настани кои ќе бидат достапни за пошироката јавност, и тоа – платформа за афирмирање на млади кореографи и битка во импровизација.

Денеска фестивалот ќе ја имплементира и новата платформа која ќе служи за афирмација на уметници во подем – „Современо-урбани кореографски минијатури“ каде свои минијатури ќе одиграат предавачите од Србија, Грција и С. Македонија, а публиката ќе има можност да го проследи и видео перформансот на танчарот Aureliene Collewet од Франција. Културниот центар Битрикс е двигател на уличната танцова сцена кај нас, па како сков постојано се залага за развој на истата и за креирање на контекст за афирмација и едукација на млади танчари.

Изминатата година центарот ја реализираше програмата ВАДА – Виртуелна Американска Танцова Академија, во соработка со Амбасадата на САД во земјата, а во рамките на која учествуваа 60 танчари од цела земја.

Од тимот на МКЦ соопштија дека програмата во првата фаза обезбеди квалитетна едукација од областа на уличните танци со реномирани предавачи од САД, но и едукативна програма за културен менаџмент. Во втората фаза пак, дел од учесниците учествуваа во подготовка на танцов перформанс со предавачот Anthony Armstrong – Slimboogie.

Нивниот перформанс првпат ќе биде одигран во рамките на фестивалот „Битрикс танцова лига“ и тоа денеска во рамките на платформата „Современо-урбани кореографски минијатури“.

 

Слични содржини

Фотографија / Книжевност / Култура
Култура / Уметност / Музика

ОкоБоли главаВицФото