Јапонскиот убиствен камен се расцепи на пола, поттикнувајќи жестоки суеверија

Тамамо-но-Мае се соочува со воин додека претворајќи се во злобна лисица со девет опашки. Автор: Јашима Гакутеи.

На социјалните мрежи во Јапонија во понеделникот се прошири приказна дека силите на темнината се ослободени откако познатата вулканска карпа, која наводно го убива секој што ќе ја допре, се расцепила на две половини.

Според митологијата околу Сешо-секи, што значи „убиствениот камен“, каменот го содржи преобразениот труп на Тамамо-но-Мае, многу убава жена која била дел од тајниот заговор на феудалниот воен лидер за убиството на  императорот Тоба, кој владеел од 1107-1123 година.

Според легендата, нејзиниот вистински идентитет била злобна деветоопашна лисица чиј дух досега беше заробен во парчето лава. Познатата локација се наоѓа во префектурата Точиги, во близина на Токио, позната по своите сулфурни топли извори.

Расцепувањето на каменот на два приближно еднакви делови, што се верува дека се случило во изминативе неколку дена, ги преплаши онлајн корисниците. Дел од нив во коментари потсетија дека, според фолклорот, каменот постојано исфрла отровен гас - оттука и неговото име.

Иако постои и легенда дека каменот бил уништен, а духот во него бил истеран од еден будистички монах кој потоа ги расфрлал неговите парчиња низ Јапонија, многу Јапонци претпочитаат да веруваат дека тој се наоѓа на падините на планината Насу.

Посетителите на областа, популарно место за разгледување, се повлекоа во ужас викендот откако сведоците објавија фотографии од скршениот камен. На нив се гледа дека јажето што претходно беше прицврстено околу неговиот обем, лежи на земјата.

„Се чувствувам како да сум видел нешто што не треба да се види“, коментираше еден корисник на Твитер во објава која привлече речиси 170 000 лајкови.

Додека други шпекулираа дека демонскиот дух на Тамамо-но-Меј воскреснал по речиси 1000 години, локалните медиуми објавија дека пукнатините се појавиле во каменот уште пред неколку години, што веројатно дозволило дождовницата да навлезе внатре во каменот и да ја ослаби неговата структура.

Каменот, кој беше регистриран како локално историско место во 1957 година, е споменат во делото на Мацуо Башо, „Тесниот пат кон длабокиот север“, и бил инспирација за но драма, роман и аниме филм.

Масахару Сугавара, шефот на локалната волонтерска група за водичи, изјави дека е штета што каменот се расцепил затоа што бил симбол на областа, но се согласи дека тоа е природен настан.

Извор: Гардијан