1005 hPa
76 %
11 °C
Скопје - Чет, 25.04.2024 02:59
И покрај сè,
не сакаш повеќе да именуваш
сматни облици и облаци
иако попусто се враќаш
со полни дланки светлина,
попусто играш тешко оро
врз цвет од сончоглед
и напразно со кус поглед
ја жнееш сета сончевина.
Нема облак и облик
што ќе ја збере
твојата горчлива плунка
и ќе ја истури
како порој врз грешните
што ја пелтечат првата буква
од своето дебело име.
И покрај сета празнина
го одбиваш со презир допирот
на тие што сакаат да сменат сè
и да именуваат нова полнотија
со леснотија на празни фрази,
за кои и планината дури
има тежина на глуварка –
на тие што патуваат по светот
со пластична насмевка
и лажен пасош.
Свесен си
за непорекливото растење
што ти ’рти од секој збор,
но и покрај сè (и над сè, би рекол),
не можеш да (и)менуваш ништо друго
освен една јасна, но несфатлива болка
за сопственото паѓање.