Pulsatio Cantus

08.06.2022 08:23

На мрежните интерантропски летови,
низ треперливи контролни зраци,
својот багаж од пренатрупаности
го провлекуваат слепи патници.

Зборот, речиси на дофат, отпоздравува,
дели реклами за карго и чартер патувања,
за жешки и студени употреби
во секое доба на денот или ноќта.

Во Аладиновата спила со кули од отпадоци
волшебната шамија на невидлива василиса
се мае крај кошниците, подовите ги мете,
загубените ги враќа во гнезда за ластовици.

Принцот не стрела разлигавени жаби,
студен зад пултот стои и подава билети,
проверува патни исправи и пребарува
патнички торби со лик на строг цариник.

Напонот е добар, освен во ретки исклучоци,
лентите беспрекорни и Земјиниот кружен лет,
симетрично се сменуваат присуства и отсуства,
плими и осеки, систоли и дијастоли, да и не...

И ние, како и Бог, речиси имагинарни.

 

Слични содржини

Секој ден песна
Секој ден песна
Секој ден песна
Секој ден песна
Секој ден песна
Секој ден песна
Секој ден песна
Секој ден песна

ОкоБоли главаВицФото