Промоција на книгата за деца „Приказни од облаци“ од Кристина Тот

16.06.2022 12:50
Промоција на книгата за деца „Приказни од облаци“ од Кристина Тот

 
Промоцијата на книгата „Приказни од облаци“ со гостување на авторката Кристина Тот ќе се одржи во кафе- книжарницата „Буква“, во петок, 17 јуни, во 20 часот. Промоторки на книгата ќе бдиат Калина Малеска и Николина Андова - Шопова

Преводот од унгарски е на Златко Панзов, илустрациите се на Бибор Тимко. Книгата е во издание на „Или-или“.

Книгата за деца „Приказни од облаци“ од Кристина Тот ја сочинуваат пет извонредни и поучни приказни: „Приказна за лилјакот што сакаше да биде птица“, „Малото рипче што си ја загуби перката“, „Приказна за меурчињата“, „Кралот на белоушките“ и „Чичкото што имаше речиси сто години“.

Овие приказни нè поттикнуваат да ја зачуваме нашата љубопитност, будноста и чувствителноста на малите деца кои го откриваат и освојуваат светот, а тоа се вештини што често ги губиме со текот на времето, со нашето раснење.

Авторката пишува смело за скриени, неизговорени табуа, ги воведува во светот на децата со приказни што одат по тенката линија помеѓу бајките и реалноста, но кои ни кажуваат за важни фрагменти, настани или личности од реалноста. Така, можеме да погледнеме во фрижидерот каде што најмалиот снежен човек на светот може да најде засолниште во текот на летото, можеме да ги слушнеме желбите на повредената златна рипка и малиот лилјак што сакаше да биде птица, мудроста на змиите, звукот на меурчиња и да учиме од мислите на чичкото кој има речиси 100 години.

Целта на овие кратки приказни е да го прошират знаењето на малите деца за светот и да им дадат можност да размислат за истиот. Да размислуваат за уникатноста на сите суштества во светот - дури и за самите себеси и другите околу нив - и убавината на животот, и покрај нејзината кревкост. Овие бајки доловуваат длабочини и височини, безвременски и минливи, радост и тага, и го гледаат светот како целина и како чудо во кое е вредно да се живее.

Кристина Тот (1967, Будимпешта) студирала унгарска книжевност. Има добиено неколку награди и нејзината поезија и проза се преведени на повеќе јазици. Живеее во Будимпешта и освен што се занимава со пишување и преведување од француски јазик, дизајнира и витражи. Позначајни нејзини дела се: „Есенското палто се бранува“ (1989, поезија), „Нишката на разговорот“ (1994, поезија), „Лондонските мечиња“ (2003, песни за деца), „Баркод“ (2006, кратки раскази), „Висока топка“ (2009, поезија), „Пиксел“ (2011, роман) и „Аквариум“ (2013, роман). Книгата за деца „Приказни од облаци“ е објавена во 2017.

Објавувањето на детската книга „Приказни од облаци“ од Кристина Тот е дел од проектот „Европска литература: зачувување на солидарноста во заканувачки контексти“, кофинансиран од програмата „Креативна Европа“ на Европската Унија.

 

Слични содржини

Фотографија / Книжевност / Настан / Око
Книжевност / Уметност / Настан

ОкоБоли главаВицФото