Без престан

Без престан
по земјата бијат
чекори, чекори, чекори,
во ритам без престан
танцуваат коледари,
џамалари, русалии,
и бубалки и створови
без престан тупотат,
воини, воини, воини
и коњи, стада и глутници,
без престан се лее ритам
на хорови, хорови, хорови,
низ колосеуми и стадиони,
на плоштади и полиња,
без престан бие ист ритам
на газење, газење, газење
по лицето земјино, распукано,
кон устата на прста пуста
што голта и голта без престан,
без престан, без престан...