Триаголници кружни

29.06.2022 14:00

Колибрито сонува дека е ракета,
нојот – само обична макета,
мравката – цела една галаксија,
бувот – глувче во саксија.
Сите сонуваат, никој не се буди,
а ноќта паѓа и почнува да студи.

Дуваат ветрови северни и јужни,
квадратите стануваат триаголници кружни,
цветовите мирисаат на сендвич со брокула,
рипче брка исплашена ајкула.
Што се случува со синиов свет.
Зошто веќе не танцува балет.
Зошто прашањата со точка завршуваат
и сенките од сонцето се отуѓуваат?

„Па добро, каква песна е ова?!“
– праша клукајдрвецот бонсаи што колва.
„Напиши нешто за јуни, за јуни,
за златниот був везден што ѕуни.
Триаголници кружни? – што ти е?!
Температура имаш ил вино си пиел?
Ајде сега пиши радосен крај,
за пчелка, за полен, за мај!“

Дооообро. Вака: Колибрито пие поленов прав,
нојот срка чорба од грав,
мравката јаде пица со десет сирења,
а бувот си нурка со една сирена.

„Подобро е“, клукајдрвецот рече
и појде на вулкан метеори да пече.

 

Слични содржини

нема
Секој ден песна
нема
Секој ден песна
нема
Секој ден песна
нема
Секој ден песна
нема
Секој ден песна
нема
Секој ден песна
нема
Секој ден песна
нема
Секој ден песна

ОкоБоли главаВицФото