1014 hPa
93 %
7 °C
Скопје - Пет, 19.04.2024 08:26
Црнее опожарениот предел
Клукајќи ја земјата како лута рана
Сè го избегнува:
Облак не наминува
Дожд не капнува
Ветрот скршнува
Птица не слетува
Сè го заобиколува
И се трга како од лепросано
Само една пеперутка
Упорно кружи над него
Обидувајќи се да го оживее
А може ли?
Слета врз црнилото блескајќи со своите шарби
Како да слетаа сите небесни градини со неа
Како да се истури сиот ѕвезден прав
И сиот сончев полен
Привлечен од блескавите бои
Се крена еден цвет да ја пречека
По него друг трет
Живна секое коренче
И си го најде загубениот пат низ пепелта
Ете колку малу требало
Едно малечко крилесто суштество
Да ја поттикне огромната земја
Да си ја поврати својата убост
И сето тоа чинејќи го за неа
Зашто нему и онака животот му е кусовечен