Artist Talk со Брук Ендрју и Иман Иса во МСУ

На покана на Музејот на современа уметност – МСУ Скопје, на 6 и 7 септември, со почеток во 19 часот, во просториите на музејот ќе се одржат отворени разговори - предавања со двајца меѓународно познати уметници - Брук Ендрју и Иман Иса.

Покрај самите предавања, целта на посетата на Брук Ендрју и Иман Иса е да направат и селекција на дела од уметничката колекцијата на МСУ, кои ќе бидат изложени на голема изложба која ќе се одржи на почетокот на следната година во Кунстхале, Виена. Во селекцијата и осмислувањето на поставката ќе бидат вклучени уште 6-мина други уметници кои ќе треба да направат паралела помеѓу нивната работа и колекцијата на МСУ, со цел да се види како денес уметниците ја доживуваат збирката на МСУ која е настаната преку уметничката солидарност.

Првото предавање ќе се одржи на 6 септември, во 19 часот, кога презентација на своето творештво ќе има Брук Ендрју, а разговорот ќе го води Тихомир Топузовски.

Интердисциплинарната уметничка практика на Брук Ендрју е поттикната од спротивставеноста на испреплетените наративи, кои честопати произлегуваат од нередот создаден како резултат на „Колонијалната „Wuba“ (празнина) . Неговата практика се темели на перспективата произлезена од Австралиските „Wiradjuri“ (група Абориџини) и Келтската персоналност. Неговите уметнички дела, музејски интервенции, истражувања и кураторски проекти ги предизвикуваат ограничувањата наметнати од структурите на моќта, историската амнезија, наспроти насочувањето и поддржувањето на домородните начини на сознавање и опстојување, и она што се подразбира под терминот „yindyamarra“ (почитување, чест, постепеното одење и одговорноста).

Брук Ендрју е професор по интердисциплинарни пракси на Факултетот за ликовни уметности и музика, и директор на музејот и колекцијата на‘реобмислување’ на Универзитетот во Мелбурн, Австралија.

На 7 септември пак, во 19 часот, предавање ќе одржи Иман Иса на тема „Застапници, со нивен сопствен живот.“ Разговорот со уметницата ќе го води Артан Садику. На ова предавање Иса ќе разговара за серија свои дела кои се занимаваат со форми со зададена функција, како што се споменици, историски наративи, филмови, уметнички дела и артефакти, размислувајќи за нивните претпоставени наследства, како и позициите на субјектите што ги оживува.

Иман Иса е уметница и професорка на Академијата за ликовни уметности во Виена. Нејзините дела досега биле изложени низ целиот свет, вклучително и во Музејот на американската уметност Витни, Њујорк, Хамбургер Банхоф, Берлин, МоМА, Њујорк, Музејот Соломон Р. Гугенхајм, Њујорк, MACBA, Барселона и уметнички центар во Бејрут... Прогласена е за уметник DAAD во 2017 година и е добитник на многу награди од областа.

Влезот е бесплатен.