Безумна маса заспана во хипноза тоне во гибел

Евтина струја

бојлер вклучен по цел ден

недела дојде

***

Подигнав плата

ги платив сите сметки

останав банкрот

***

Прекраток буџет

кога ли ќе заврши

месецот предолг

***

Сиромашен век

на погрешен колосек

исплашен човек

***

Сув леб и ајвар

над библија револвер

ем нож до коска

***

Ме влечат за НОС

начулија и УШИ

им затнав УСТА

***

НИШТОжниците

сакаат СÈ да зграбат

СВЕ да им ебам

***

Празни денови

преполни со неспокој

од празноглавци

***

Едноумие

од мноштво безумници

сал ум што перат

***

Безумна маса

заспана во хипноза

тоне во гибел

***

Бегај од него

од слаткоречивиот

ѓавол во костум

***

Ослепен од „сјај“

главуч во лажен гламур

празноглав и штур

***

Куртул се нема

од високи големци

со ниски страсти

***

Ти срамна вошко

без грам срам ниту доблест

сиот живот мал

***

Проклетиот скот

без капка пот зграби сè

арам да му е

***

Две ладни тела

чекаат во одела

поп во капела

***

Таму во Бутел

се копа нова дупка

грешник да прими

***

Злоставен човек

натоварен со грижи

лесна му земја

***

Исусе Христе

од јуди и пилати

дерман се нема

***

Во вечен раскол

занемена вистина

ужас без крај

Слики: Walter Molino