Промоција на сликовницата „Пргав зајак" од Пандалф Вулкански и Будимка Поповска во Галерија Метаноја

Во петок, 17 март, со почеток од 20 часот, во Галеријата Метаноја (ул. Максим Горки бр.19) ќе се одржи промоцијата на сликовницата „Пргав зајак" од авторите Пандалф Вулкански (текст) и Будимка Поповска (илустрации).

Пандалф Вулкански е псевдоним на Никола Гелевски. Станува збор за искусен автор со богат книжевен опус кој зад себе има претежно експериментална поезија и проза, и за деца и за возрасни. Работи како уредник, преведувач и издавач.

Будимка Поповска е писателка, поетеса и уметница од Скопје. Студирала класична филологија на Универзитетот „Св. Кирил и Методиј“ во Скопје. Од 1996 до 2015 живее во манастир, каде што ја изучува старата македонска школа на цртање икони. Потоа се враќа дома и живее во Скопје каде што работи како иконописец, колумнист (фриленсер) во македонската периодика. Член е на Друштвото на писатели на Македонија од 2013 година и ги има издадено книгите: „Врата“ (графичка поезија, 1994), „Полигони“ (раскази, 2007), „Друга визура“ (есеи, 2008), „Невидливи вежби“ (прозна поезија, 2011), „Куќа на Марс“ (поезија, 2019), „Ботичелиев каталог“ (есеи и фотографии, 2019), „Полигони“ и „Невидливи желби“ (на хрватски, 2021).

Остварила неколку изложби, меѓу кои групната изложба како член на групата Абау а ку - „Млечен град“ (МКЦ, 1991), самостојната изложба „Фантомима“ (МКЦ, 2019); како и самостојната изложба "Супа од Чиопа" која моментално може да се проследи во галеријата Метаноја.