Кркач на кркуш носи тркач

Сè си е на место

Кркач на кркуш носи тркач, скокач прелетува летач, веслач во чамец вози пливач, плетач брзнува во плач.

***

Менувач-минувач и сретнувач-светнувач разговарале шетајќи се низ парк.

„Ние сме фланери“, рекол менувач-минувач. „Вака Бодлер го дефинира новиот вид човек, градскиот шетач: толпата е неговото царство, како што воздухот е царство на птицата, а водата царство за рибата.“

Фланерот го ботанизира асфалтот, според Бенјамин“, одговорил сретнувач-светнувач.

Тогаш се појавиле и заминувач-исчезнувач, изведувач-извидувач и замислувач-занесувач.

„И ние сме фланери!“, рекле тројцата.

***

Замислувач-занесувач му рекол на заминувач-исчезнувач:

„Ти си талкачки континент.“

„А та си талкачки инконтинент“, одговорил заминувач-исчезнувач.

***

Збунувач-појаснувач на лулашките во парк му рекол на лулач-луфтирач: „Ликовите во парков се како бабушки: празни, а полни со себе.“

Веднаш дотрчал прашувач-сослушувач и го замолил збунувач-појаснувач да објасни.

А лулач-луфтирач толку се смеел што паднал од лулашката.

***

Збунувач-појаснувач му рекол на заведувач-изведувач:

„Многу добро умееш да не ме разбереш, како што умееш да не ги најдеш оние што не ти се блиску, а кои заправо не ги ни бараш.“

Заведувач-изведувач вака одговорил: „Оддалечени сме еден од друг како планетата на човек што брои ѕвезди од планетата на човек што пали фенер.“

***

На клупа во парк седеле заљубувач-заладувач и прегорувач-прегрејувач.

Поминал привлекувач-прилепувач, а прегорувач-прегрејувач рекол:

„Типов има поглед магнетна резонанца.“

***

Посакувач-исполнувач и поканувач-пленувач ги поканиле на клупа во парк заљубувач-заладувач и прегорувач-прегрејувач, за да ги зафркаваат.

***

Пред дупката и кантата на паѓач-спуштач и седач-легач еднаш дошле заведувач-изведувач, замислувач-занесувач и запнувач-забавувач со три пластични огромни ќупа, земени од „Пластичарска“.

„Сега ќе ја одиграме едночинката ’Игра’ од Семјуел Бекет“, рекле и тројцата влегле во ќуповите, само главите им ѕиркале оттаму.

Како публика веднаш дотрчале читач-пишувач, цицач-чистач и цртач-чкртач.

Од дупката и кантата за ѓубре љубопитните глави ги подизвадиле и паѓач-спуштач и седач-легач.

„После не толку долгиот заеднички живот...“, рекол запнувач-забавувач од ќупот.

Тогаш зад него паѓач-спуштач, со големо крваво марамче врз лицето, од кантата го удрил по глава, со куче-играчка, седач-легач во дупката.

„Браво!“, извикал читач-пишувач од публиката.

Куклите ги изработи: Марина Глебова