Чудесните хипнотизирачки модни дизајни на Ирис ван Херпен

Извонредната ретроспектива на чудесните парчиња облека на Ирис ван Херпен во Музејот на применети уметности во Париз, насловена „Обликувајќи ги сетилата” (Sculpting the Senses) е прослава на револуционерниот придонес на холандската модна дизајнерка, со акцент на нејзиниот специфичен сензибилитет со кој во модниот дизајн ги вметнува уметноста и науката.

Ван Херпен го основаше својот истоимен бренд во 2007 година и оттогаш создаде огромен опус кој ја доловува убавината на природниот свет. Необичното здолниште „Пајаков корсет”, дел од колекцијата „Мета морфизам”, на пример, има скулптурална форма и крилести елементи.

Другите модели се обликувани на сличен начин, како оние од колекцијата „Хипноза“, каде што се претставени сферични здолништа и дезени што се нишаат со хипнотизирачки движења.

„Динамична тензичност, флуидност, деликатност и комплексност, проткаени со поезија и филозофија: ова се главните елементи во дијалогот што Ван Херпен го воспоставува помеѓу телото и облеката, што и овозможува да долови една нова, богата, ентузијастичка перспектива на светот што доаѓа“, пишува кустосот на изложбата, Клое Питио.

Покрај дизајните на ван Херпен, изложбата вклучува и дела од уметници како Кејси Куран, Роган Браун и Џанаина Мело Ландини, кои ја инспирирале и соработувале со дизајнерката низ годините.

Извор: https://www.thisiscolossal.com/