Промоција на книгата „Автопортрет со седум прсти” од Ацо Шопов

Во културниот центар „Лабораториум”, на 19 март (вторник) од 19 часот ќе биде промовирана книгата „Автопортрет со седум прсти” од Ацо Шопов во издание на издавачката куќа „Антолог”.

„Сите го знаеме Шопов како суптилен лиричар, но кој го знае како есеист и беседник со изострен слух за литературата и уметноста, како толкувач на општествените текови и драми, како остар полемичар, ангажиран општественик, издавач и интелектуален работник? Ете, тој Шопов ќе го откриете, преку неговото перо, во неговиот „Автопортрет со седум прсти”, книга во која за првпат се собрани непознати прозни текстови од македонскиот поет” - стои во најавата за настанот.

Првенецот на МНТ, Никола Ристановски, на најсугестивен начин ќе ја долови поезијата во прозата на Шопов, на 19 март, кога со публиката ќе бидат споделени содржините на ова исклучително значајно дело за културната меморија на нашата земја.

Низ страниците на книгата, со своите видувања и толкувања настанот ќе го води Владимир Мартиновски, деканот на Филолошкиот факултет „Блаже Конески”, а во промоцијата ќе му се придружи и Јасмина Шопова, приредувач на книгата.

Промоцијата ја организираат Фондацијата „Ацо Шопов – Поезија“ и „Антолог”, во соработка со „Лабораториум”, едукативен културен центар кој се дефинира „повеќе како идеја отколку како простор, но и како простор за идеи”... и кој во себе го носи и го пренесува на младите генерации духот на старата печатница на „Нова Македонија”.

Кон промоцијата се приклучуваат и Националната опера и балет, ФлипБук Фестивал на анимирани филмови и ДЛУМ, со сегменти од нивните уметнички продукции во рамките на „2023, Година во чест на Ацо Шопов”.