1014 hPa
61 %
23 °C
Скопје - Пет, 17.05.2024 18:38
Преса
Инквизиторите се меѓу нас. Живеат на сутерените во големите згради и само натписот ПРЕСА ОВДЕ ја оддава нивната присутност.
Маси со напрегнати темни мускули, силни валјаци кои полека но прецизно дробат, замаено тркало кое не знае за милост - нè чекаат.
Чаршафите кои ги изнесуваат од пресата изгледаат како празни тела на вештици и еретици.
Војна
Поход на челични петлиња. Момци обоени со вар. Алуминиумски парченца разоруваат куќи. Исфрлаат заглушувачки, сосема црвен шрапнел во воздухот. Никој нема да одлета на небото. Земјата го привлекува телото и оловото.
Мачор
Целиот е црн, но има електризиран опаш. Кога спие на сонце, тој е најцрното нешто што може да се замисли. Дури и во сон лови преплашени глувци. Тоа се познава по ноктите кои му израснуваат од шепите. Необично е мил и расипан. Ги бере птичките од дрвјата, пред да созреат.
Превод: Иван Шопов
Слика: Ditz