Новиот албум на Jane’s Addiction

Jane’s Addiction
„The Great Escape Artist“
Capitol, 2011

Креаторот на терминот ‘alternative nation’, Perry Farrell, и лидерот на еден од водечките американски алтернативни рок бендови Jane’s Addiction, по пауза од осум години го издадоа својот најнов албум „The Great Escape Artist“.

Претпоставувам дека повеќето ќе бидат позитивно изненадени од квалитетот на албумот кој е одличен. За мене значи замена на „Ritual de lo Habitual“ кој ми беше омилен албум за подобрување на расположението. Сега тоа е „The Great Escape Artist“. Десетте песни се слушаат спонтано, каде што потешкиот алтер звук е освежен со пошироки мелодиски креации на вокалот, заводливи ритмички дуети меѓу гитарата и тапаните, односно интерпретацијата на Davе Navarro и Stephen Perkins. Бендот за овој албум соработуваше со нов басист тоа е Dave Sitek од TV on the Radio, кој заедно со Rich Costey (продуцент на Interpol, Nine Inch Nails, Muse, и др.), работеше и на продукцијата на албумот. Така, тоа значи и реминисценција или асоцијација со пост-панк звуците на The Cult, Gang of Four или Killing Joke, но и додавање на нови елементи како електро звуци, на пример, во третата песна Curiosity Kills, во којa сигурно има влијание новиот басист Дејв Ситек.

Албумот го отвора песната Underground која го реобновува препознатливиот звук на бендот, гитарската комбинацијата меѓу хеви-метал и панк-рок рифовите. Тоа делумно важи и за End to the Lies, Ultimate Reason и за последната Words Right Out of My Mouth. Мојата омилена тројка е меѓу четвртата и шестата песна. Irresistible Force e најенергична песна на цел албум, во која се говори за креацијата, секако која треба да се толкува индивидуално. Ете, за Фарел значи машко-женски акт на креација на космичка љубов. Фарел ја почнува песната со шепотење - We didn't know that it would blow up, With such might, The stars are even brighter, Contrasted by the night, за да стигне до кулминацијата и рефренот - Ah the irresistible force met the immovable object.

I’ll Hit You back, е мелодичина песна на албумот во која има баланс меѓу сите изведувачи, зачинето со остра порака дека проблемот е совладан. Во Twisted Tales, Фарел освојува преку нежната изведба на рефренот. Претпоследната песна Broken Тales е меланхолична приказна, посветена на девојка која не може да се снајде во одредена ситуација или да ја реши.

На музички план има отстапка од бесните, конфронтирачки карактеристики за Jane’s Addiction, реализирано преку баладичниот карактер, мирната гитарска делница, сензитивниот израз на Фарел.

„The Great Escape Artist“ сигурно ќе биде ставен во групата на најдобри алтер-рок остварувања за 2011.